قالوا ترى مـالك امــل في قربهـا لو يوم
ابــعد وجنب دربهـا ..هـــذا هو المقسوم
قلت اتركوني واسكتوا ..خلو العتب واللوم
قدني غرقت في بحرها..ولاعاد يفيد العوم
قالوا ترى في حبها ويل ..واسى..واهموم
قلت انا قتلني حبها .. حسبي تقول مرحوم
قالوا انسى ذكرهــا .. منتب بهـــا ملزوم
قلت ابـــشروا ياعذلين .. بنسى لذيذ النوم
قالوا بتلقى غيرهـــا .. واترك هواها اليوم
قلت العفو ياحاسدين ..ما ابدل القمر بنجوم
قالوا لـغيرك حبها .. قلت الجـــواب مفهوم
دام انـهــــا متهنيه .. وشلون اصير محروم
بقضي الليالي انتظر .. صابر على المقسوم
متعلق بطــرف الأمــل .. يـمكن يجيني نوم
ليست هناك تعليقات:
إرسال تعليق